يا سلام عليك يا عم ابراهيم يا قائد التنوير بين الفلاحين
فاكر لما كنت بتروح بالمواشى بتاعتك لواحد عنده ثور من جيرانك القريبين
و الثور كان صاحبه مبيريحوش و بقى عامل زى العجول الهفتانين
ولو كان عنده مرض ولا حاجة هتتنقل للبهايم عند كل الفلاحين
ولو بقرة مريضة يلقط منها المرض ويتنقل منه للبقر بتاع الناس الطيبين
وبكده يبقى أبو كل العجول والعجلات كبار ولا صغيرين
وهو ده موضوع جواز القرايب اللى بيضعف السلالة مع السنين
ويقلل إنتاج اللبن ويضعف عجول التسمين
وانك رحت للدكتور اللى قاللك ان التلقيح الصناعى هو سكة التحسين
لأن السائل المنوى بيتجمع من طلايق جايين من أبهات وجدود عفيين ومأصلين
طلايق جاموس وبقر ملهمش شغلانة غير كده يعنى مبيخدموش فى الفلاحة وعلطول مستريحين
بيتراعوا أحسن رعاية آكلين شاربين نايمين وسائلهم المنوى يفضل سليم حتى لو اتحفظ سنيين
واحنا كمان بنحافظ عليه تمام زى عنينا علشان نفيد به أكبر عدد من أهالينا الفلاحين
واللى بنجمعه من نطة واحدة بيتحفظ ويتقسم ويتلقح به عدد كبير من المواشى اللى صارفين
علشان الطلايق دى عفية وبحاجة بسيطة بتدى ولادها أحسن صفات وأعلى انتاجية
يعنى ولادها يبقى جسمهم زى أبوهم ويكبروا بسرعة وتاخد منهم أحلى ربحية
وان الدكتور قاللك متجربش مع التعبانين وبعدين تروح تقول آدى كلام المتعلمين
وانك فعلا جربت وجالك أحلى عجلة جاموسة سميتها نوسة ومعاها عجل عفى للتسمين
طيب فى الختام تقول ايه يا ابو ياسمين لأهالينا واخواتنا الفلاحين
أقول لكل الفلاحين يلا الحقوا سكة التحسين اللى فعلاً خذت منها شوية ولادات حلوين
ربنا إن شاء الله هيكرمكوا ويكرم بلدنا بالناس الطيبين
آمين آمين يارب العالمين