حكاية صغيره من حياتنا عن فلاح ناصح خايف على حيواناته ماهى رزقه ورزق عياله. لما حس ان في حاجة غريبة فى غنماته جرى بسرعه على الدكتور يقوله على اللى شافه و كان الحوار التالى:
سلام عليكم
ازيك يا دكتور
ازيك يا حاج عوضين و ازى غنماتك
الحمدلله يا دكتور بس اليومين دول ظاهر عليهم حاجات كده عايزة اقولك عليها
قول يا حج عوضين
ظاهر عليهم حرارة شديدة وخملانين كده و مبياكلوش خالص وكمان في إفرازات كده من العين و من الأنف و لعابهم سايل علي طول و في قشور حول الأنف والفم و علي الذيل
آه يا حج عوضين خلينى أقولك علي مرض بيصيب الأغنام دى و نوصل لحل
المرض ده يا حج عوضين مرض فيروسي اسمه جدرى الأغنام و الماعز بيتميز بطفح جلدى عام و حمى و قشور
مصدر العدوى بيكون القشور من الحيوان واللعاب واللبن و الإفرازات من العين و الأنف أما بقي طريقة العدوى بتكون عن طريق التنفس من خلال الهواء المحمل بالرذاذ أثناء الاختلاط المباشر بين الأغنام و الماعز و كمان بيكون عن طريق الجلد المتقيح و لدغات الناموس إنما بقي فترة حضانة المرض ده بتكون من ٧-١٤ يوم بتظهر علي الأغنام حمى شديدة عابرة مصحوبة بخمول و فقدان شهية و توقف الهضم و كمان بتظهر افرازات دمعية من العين و افرازات أنفية و سيولة في اللعاب و الأعراض بتظهر بعد مرور الحمى العابرة في صورتين:
•حميدة و بتتركز البثور في الأماكن الخالية من الشعر و الصوف في الوجه و الرقبة والأذنين و الساقين و البطن و تحت الذيل و الضرع
• غير حميدة و بتتركز البثور علي كل الأغشية المخاطية للجهاز الهضمي و التنفسي والمسالك و كمان علي المناطق المغطاة و الغير مغطاة بالصوف و الشعر
ولما نتكلم عن علاج المرض ده وعشان هوه مرض فيروسي فبالتالي لا يوجد له علاج الا العلاج الموضعى للطفح الجلدى و العلاج الظاهرى للأعراض الظاهرية
عشان كده يا حج عوضين عشان نتحكم في المرض ده لازم نعزل ونعالج الحيوانات المريضة ونتخلص من الجثث النافقة و التحصين التحصين هنحصن باللقاح الحى المستضعف بيتم حقن الحيوان تحت الجلد بنص سم في منطقة خالية من الشعر او الصوف تحت الذيل.
و قريب نتقابل مع حكاية جديدة لفلاح ناصح.
مع تحيات إدارة الإرشاد بمحافظة الدقهلية
د/منال إمام
د/مروة عبد السلام