قواعد_البيطري_الاربعون

تبدأ من: 30/05/2019 الى: 30/05/2019

💪#قواعد_البيطري_الاربعون💪

١_انت كدكتور بيطري هتتعامل مع ابسط ناس في الدنيا وفي نفس الوقت اذكاهم ومعظمهم فلاحين .فلازم تكون واثق من نفسك ومن شغلك ومن قدراتك المهنية👍
٢_اتعامل في حدود .يعني ما تنزلش بمستواك اوي لمستوي واحد بيستظرف عليك وتضيع هبتك لمجرد انك عاوز تكسب زبون لانك وقتها هتخسر نفسك كدكتور👌
٣_عارف تشخيص الحالة بس ما تشرحش للعامل والتمرجي اللي معاك ..لانه هيحفظ منك وهيشتغل دكتور بعد كدا ويغلط فيك .. ويذم في شغلك ودا كارثة .✊
٤_لما تقرر تدي العلاج ما تطلبش من التمرجي اللي معاك يسحب الحقن بنفسه ..لانه ساعتها بردو هيعرف انت اديت ايه والجرعه كام ..وبردو هيشتغل ويعمل دكتور✋
٥_لازم تتابع الحالة بنفسك .ما تاخدش بكلام صاحب الحالة .لانه ممكن ما يبقاش مركز ..وبعد كام يوم الحالة تسوء فيجيب غيرك وتلاقي نفسك ما بتعرفش حاجة في نظرهم للاسف 👆
٦_لما يجيلك حد علي كشف في الغيط .ما ترفضش تروح ..لان مهنتنا مهنة شاقة و لازم يبقي لك بريستيج👍👍في اي مكان
٧_لو مش عارف التشخيص ما تفتيش .واطلب مساعدة زميل كبير مش عيب .بس العيب انك تألف وتغلط وتبوظ صورتك عشان تمن الكشف ما يضيعش عليك
٨_ما ينفعش وانت بتشرف علي شغل مزرعه تقبل كام جوز فراخ علي سبيل الهدية ..لانها هتتفهم غلط بعد كدا كإنك مرتشي✌
٩_وانت نازل حملة تفتيش علي اللحوم لازم تبقي واثق في كلامك ولا تتهزش من منظر سكينة الجزار .لان اللحم الفاسد هياكله اهلي واهلك ..خليك منصف وقد المسؤولية
١٠_لو معاك طلاب بتتدرب عرفهم كل حاجة ما تبقاش بخيل ..لانهم دكاترة ونفسهم يفهموا ويشتغلوا زيك
١١_وانت بتكتب روشته اكتبها انجلش ..لانها هتتصرف من دكتور زيك بلاش العربي ده شغل الباراميدكال .اللي احنا بنحاربهم لانهم واخدين مكان غيرهم 👊
١٢__لو في مجزر وحضرتك مشرف علي الدبح ..خلي عندك امانه واعدم المصاب واوعي تعدي حالة مش هي.. عشان تجامل قريب او صاحب دا ربك شاهد☝
١٤_لو حضرتك بتعالج حالة انت واثق انها مش هتنفع وحلها الدبح ..بلاش تكلف صاحبها كتير ووفر الادوية ووفر فلوسها .وكمان ارحم لحمها من المضادات الكتير .وقول تنفع للاكل ولا لا👍👎
١٥_لو شغال في معمل تحاليل ولقيت عينة بروسيلا ايجابي ..لازم تخاطب الوحدة البيطرية بكدا .والا فممكن جدا نتسبب في عدوي بشر مالهومش ذنب لمجرد ما تزعلش صاحب العينة ☝☝
١٦_لازم يكون عندك لباقة في التعامل مع صاحب الحالة لان منهم كتير بيختبرك طول الوقت ..بتفهم ولا لأ
١٧_وانت شغال إلبس البالطو بتاعك للمظهر الحلو وللحفاظ علي نفسك
١٨_ ما تسمحش للباراميدكال يعدل عليك ..واكتب الادوية دايما الفعالة حتي لو ستين غالية ..لان الحيوان ده هو راس مال الفلاح 💕
١٩_لو جالك حد بحالة وكان كاشف عند زميل بلاش تغلط فيه وتقول دكتور فاشل اللي كاتب العلاج ده ..لازم تحترم زمايلك وتحترم وجهة نظرهم في الشغل
٢٠_لو تم تكليفك تشرف علي لحوم ودواجن المستشفي في نطاق شغلك ..بلاش تتفق مع المراقب الصحي يمضيلك وانت نايم ..لازم تروح تباشر عملك ..دي ارواح ناس
٢١_لو جالك واحد يستنجد بيك عشان معزة بتولد بالليل وبتموت وقالك إلحقني. قوم معاه ما تقولش دي معزة ..هي بالنسبة له ثروة وانت بالنسبة له دكتور معالج .ودا واجبك وشغلك💟
٢٢_ما توطيش بنفسك قدام حد ولا تسمحش لحد يتريق علي شغلك ..انت طبيب وقائي قبل ما تبقي طبيب بيطري
٢٣_لو حضرتك شغال مندوب دعاية وعمرك ما مارست المجال وحد جالك علي حالة ما تقولش ما اعرفش وابعته لزميل شغال فعلا عشان مافيش دكتور يقول ما اعرفش
٢٤_لو عالجت حالة وماتت بالفرض ما تتعقدش وتحس بالفشل. .دا وارد عادي بس اتعلم من الخطأ ..واعرف اكتر عن المرض اللي خلاها ماتت ومافيش علاج جاب فيه نتيجة
٢٥_لو جاتلك ست بقفص بط وفراخ وطلبت تحصن ما تقولهاش انا مش فاضي ومش بتاع فراخ ..لانك دكتور بيطري ودا شغلك ومش حاجة عيب👍👍
٢٦_ قررت تبيع بط وفراخ وحمام في صيدليتك ..اتحمل سخافة اي حد مش فاهم انه من تخصصاتك اشراف ع المزارع وتربية دواجن واشراف ع البيع
٢٧_لو حد جالك حالته الماديه صعبة وقصدك ما تكسفوش ..وصدقني ربنا هيكرمك
٢٨_راعي ربنا في الجرعات اللي بتديها ..بلاش تبص للمكسب .وادي الجرعه صح تكسب اكتر
٢٩_ اهتم بارشاد الناس طول ما انت شغال للصح ..وكلمهم عن اهمية التحصين واهمية المتابعه معاك💞
٣٠_ اهتم بتشريح الحالة الميتة لو امكن عشان تشخص صح وتكسب ثقة الاونر
٣١_ لو معدي ولقيت جزار دابح خارج السلخانه ..بلغ وقتها ومارس وظيفتك
٣٢_ عرف الناس ان الحالات الميتة ..يتم دفنها منعا من انتشار المرض👍👊
٣٣_لو فيه قوافل مجانية ..شارك بمجهودك .لخدمة الناس الغلابة
٣٤_إوعي ابدا تقرف وانت بتتعامل مع الحيوانات. دا شغلك
٣٥_ اهتم بنظافة وشياكة عيادتك ..لانها عنوانك قدام الناس
٣٦_ لو لقيت طالب او طالبة بيسالك عن الطب البيطري ..ما تحبطوش وتخوفه وتقرفه ...بالعكس شجعه ..وحمسه عشان يحب المجال👍👍
٣٧_ ما تبخلش علي طالب ب المعلومة لانه زميل
٣٨_ حب مجالك ..هتنجح فيه👍💔💓
٣٩_ ما تسمحش لحد يشتغل في مجالك طالما مش دكتور ..لان دا اساءة لشغلك ..ما تقبلهاش
٤٠_ انت دكتور بيطري مهم جدا ..وخط الدفاع الاول عن الانسان فافخر بنفسك
#دكتورة_سماح_نوح